Handeni imepata neema

Imerushwa: December 7th, 2018

TAARIFA KWA UMMA NA VYOMBO VYA HABARI

Mkurugenzi Mtendaji wa Halmashauri ya Wilaya ya Handeni Bw. William M. Makufwe anawatangazia wananchi wote wa Halmashauri ya Wilaya ya Handeni kuwa Halmashauri imenunua mbegu za Korosho inayoweza kuzalisha miche 600,000 kutoka Kituo cha Utafiti Nalielendele iliyoko Mkoa Mtwara.

Hivyo anawataarifu wananchi wote wenye mahitaji ya kupanda Korosho wajiandikishe kwenye ofisi za Kata au vijiji wakiainisha mahali lilipo shamba na ukubwa wake

Aidha amesema Wakulima watapewa miche/mbegu hiyo kwa masharti yafuatayo

• Wakulima watatakiwa kujaza fomu ya mkataba wa kutunza zao hilo na iwapo mkulima atashindwa kuhudumia shamba lake kwa uzembe atalipa kila mbegu/ mche kiasi cha shilingi 500.
• Mkulima aandae shamba lake kitaalamu kabla ya kupanda na shamba litakaguliwa na Wataalamu wa kilimo.
• Shamba la mkulima liwe ndani ya eneo la Halmashauri ya Wilaya ya Handeni.

Mbegu/ miche hiyo itaanza kugawiwa bure kwa wakilima kuanzia tarehe 15-02-2019 katika Ofisi za Makao makuu ya Kata . Hivyo wakulima wanahimizwa kujiandikisha mapema kiasi cha miche/ mbegu wanayohitaji.

 Ikumbukwe kuwa ekari moja kitaalamu  inauwezo wa kupandwa miche 30.

Nawatakia utekelezaji mwema.

Imetolewa na;

Kitengo cha Habari na mahusiano

Halmashauri ya Wilaya ya Handeni