Imerushwa: December 24th, 2022
Rais wa Jamhuri ya Muungano wa Tanzani Mhe. Dkt. Samia Suluhu Hassan ametoa zawadi mbalimbali za sikukuu ya Christmas na mwaka mpya kwa vituo vitatu vya Faraja Children’s home kilichopo Kata ya Kabuku, Kituo cha Watoto wenye mahitaji Maalum kilichopo Kijiji cha Kwamkono na Kituo cha Kulelea Watoto yatima cha Michungwani kilichopo Ngojoro Kata ya Kwamgwe vyenye jumla ya Watoto 103.
Zawadi hizo ni Mchele, sukari, maharage, sabuni pamoja na mafuta ya kupikia, mbuzi mmoja kwa kila kituo na fedha tasilimu kiasi cha shilingi laki mbili kwa kila kituo.
Akikabidhi zawadi hizo kutoka kwa Rais wa Jamhuri ya Muungano wa Tanzania, Mkuu wa Wilaya ya Handeni Mhe. Siriel Mchembe amemshukuru Rais kwa kuugusa moyo wa Mungu kwa kupelea mahitaji kwa wahitaji na amefanya jambo la kihistoria ambo hili ni la kuigwa kwa kuwakumbuka wanyonge na watoto wenye uhitaji nchi nzima.
Kwa namna ya kipekee Mhe. Mchembe amewatakia wananchi wote wa Wilaya ya Handeni heri ya sikukuu hizo za mwisho wa Mwaka na kuwataka kuendelea kuitunza amani na kusherehekea bila kuvunja sheria, kutofanya vurugu ya aina yoyote na kuwakumbuka watu wenye uhitaji.
