Imerushwa: September 3rd, 2017
Waheshimiwa Madiwani wanaounda Baraza la Halmashauri ya Wilaya ya Handeni wamefanya uchaguzi mdogo wa Makamu mweyekiti wa Halmashauri , Wenyeviti wa Kamati zinazoongozwa na Baraza na wajumbe wa kamati husika katika kutekeleza sheria, taratibu na kanuni.
Uchaguzi huo umefanyika mwishoni mwa wiki walipokuwa kwenye kikao cha Baraza la kufunga mwaka 2016/2017 kwenye ukumbi wa Halmashauri ya Wilaya ya Handeni.
Aliyekuwa Makamu mwenyekiti wa Halmashauri ambaye amepata fursa ya kuchaguliwa tena kwa kura 25 kati ya kura 26 Mh. Abdalla Pendeza amewashukuru Madiwani kwa kumwamini na kumpa tena nafasi ya kuongoza kama Makamu Mwenyekiti wa Halmashauri na kwamba kama walivyoweza kupeleka mbele maendeleo ya Halmashauri vivyo hivyo watarajie muendelezo wake kwa Muhula huu mwingine.
Aidha amewaomba Madiwani kushirikiana kwa hali na mali ili kuhakikisha wananchi wanaowahudumia wanapata huduma stahiki, kwa wakati na weledi.
Kamati zilizochagua wenyeviti wao ni Kamati ya Huduma za Jamii ( Elimu, Afya na Maji) mwenyekiti wao ni Mh.David Matula, Mwenyekiti wa Kamati ya Ujenzi,Mazingira na Uchumi ni Mh.Joel Mabula, nafasi ya Mwenyekiti wa Kamati ya Fedha, Mipango na Uongozi imebaki kwa Mwenyekiti wa Halmashauri Mh. Ramadhani Diliwa na Kamati ya Ukimwi Mwenyekiti wake amebaki Mh. Abdalla Pendeza.
